Vilja stöðva starfsemi fyrirtækja sem hunsa reglur vinnumarkaðarins

Stöðva verður umsvifalaust starfsemi þeirra fyrirtækja sem ekki virða leikreglur íslensks vinnumarkaðar. Þetta kemur fram í ályktun sem miðstjórn Alþýðusambands Íslands samþykkti í dag. Forseti sambandsins segir þolinmæði gagnvart fyrirtækjum sem brjóta á rétti starfsmanna á þrotum.

„Það er búið að gefa þessum fyrirtækjum marga fresti til að koma sínum málum í lag," sagði Grétar Þorsteinsson, forseti Alþýðusambands Íslands, í samtali við Vísi. „Þetta má ekki dragast lengur og það þarf að stöðva starfsemi þeirra fyrirtækja sem ekki virða leikreglurnar."

Í ályktun miðstjórnar Alþýðusambands Íslands er seinagangur í þeim málefnum er snúa að réttindi erlendra starfsmanna harðlega gagnrýndur. Þar segir ennfremur að ítrekað hafi fyrirtæki komist upp með að svara ekki lögmætum tilmælum eftirlitsstofnana og trúnaðarmanna starfsmanna. Fyrirtæki komist upp með að endurráða starfsmenn og losa sig undan því að leggja fram umbeðin og tilskilin gögn yfir þann tíma sem liðinn er án frekari aðgerða Vinnumálastofnunar.

Þá krefst miðstjórnin þess að starfsemi þeirra fyrirtækja sem staðin hafa verið að því að virða ekki launauppgjör og tryggingar starfsmanna í samræmi við leikreglur íslensks vinnumarkaðar verði umsvifalaust stöðvuð.

Grétar bendir á þetta sé ekki nýuppgötvað vandamál en rútuslysið í Besstaðabrekku í Fljótsdal í lok ágústmánaðar þar sem tugir manna voru án réttinda hafi verið kornið sem fyllti mælinn. „Okkur sýnist að nú sé upp runnin sú stund að tekist verði á við þetta vandamál af mikilli festu og alvöru. Þolinmæði okkar gagnvart þessum fyrirtækjum er á þrotum."