Glitnir hyggur á landvinninga í jarðvarmaverkefnum í Bandaríkjunum

Fjallað er um væntanlegar fjárfestingar Glitnis í jarðvarmaverkefnum í Bandaríkjunum í erlendum miðlum í dag. Fyrirtækið kynnti áætlanir sínar á blaðamannafundi í New York í dag þar sem ný skrifstofa þess var opnuð.

Reuters-fréttastofan greinir frá því að Glitnir hyggist fjárfesta fyrir einn milljarð dollara, yfir 60 milljarða króna, í jarðvarmaverkefnum á næstu fimm árum og að félagið ætli að láta mikið að sér kveða þegar vægi grænnar orku eyskst í landinu.

Eftir því sem fram kemur í tilkynningu frá Glitni stóð félagið fyrir ráðstefnu um orkumál í New York sem var fjölsótt. Meðal þeirra sem fluttu ávörp voru Ólafur Ragnar Grímsson, forseti Íslands, og Alexander Kersner, aðstoðarorkumálaráðherra Bandaríkjanna.

Hægt að sexfalda raforkusölu frá jarðvarmavirkjunum

Þá kynnti Glitnir þær niðurstöður sérfræðinga bankans að unnt væri að sexfalda raforkusölu frá jarðvarmavirkjunum í Bandaríkjunum á ári, úr 1,8 milljörðum í 11 milljarða Bandaríkjadala á ári. Mögulegt væri að jarðvarmavirkjanir gætu annað 20 prósent af orkuþörf Kalíforníu, 60 prósent orkuþarfar Nevada og 30 prósent raforkuþarfar Hawaii.

Enn fremur áætlar Glitnir að fjárfesta þurfi í nýjum verkefnum sem ljúka eigi á næstu fimm árum fyrir 620 milljarðar króna og að samanlögð fjárfestingarþörf á sviði jarðvarmanýtingar í Bandaríkjunum til ársins 2025 sé jafnvirði um 2.550 milljarða króna.

Tími jarðvarmans kominn

Fram kom í máli Árna Magnússonar, framkvæmdastjóra Orkusviðs Glitnis, að félagið hefði þegar fjármagnað þrjá samninga sem sneru að jarðvarmavirkjunum. Þá bætti hann við að Bandaríkin væru í forystu í þróun endurnýjanlegra orkugjafa og að tími jarðvarmans væri kominn, ekki aðeins í Bandaríkjunum heldur á heimsvísu.

„Starfsstöð Glitnis í New York mun gegna hlutverki miðstöðvar í Norður-Ameríku, annars vegar fyrir sérfræðinga Glitnis á sviði jarðvarma og fjárfestinga og hins vegar fyrir fulltrúa bandarískra fyrirtækja sem vilja nýta þessi tækifæri," segir Árni.