Dagdeild opnuð við líknardeildina í Kópavogi

Félagar í Oddfellow-reglunni á Íslandi færðu í dag Landspítalanum dag-, göngu- og fimm daga deild fyrir sjúklinga á líknardeild Landspítalans í Kópavogi. Slíkt er nýjung í starfsemi líknardeildar.

Stórsír Oddfellow-reglunnar á Íslandi, Gylfi Gunnarsson, afhenti húsnæðið við hátíðlega athöfn í dag og tók Guðlaugur Þór Þórðarson heilbrigðisráðherra við framlagi Oddfellow-reglunnar fyrir hönd spítalans og færði gefendum þakkir fyrir höfðinglegt framlag.

Fram kemur í tilkynningu frá Landspítalanum að í tilefni af 100 ára afmæli Oddfellowreglunnar árið 1997 hafi reglan ákveðið að veita fé til uppbyggingar líknardeildar Landspítalans í Kópavogi. Með sameiginlegu átaki spítalans og hennar var deildin opnuð í apríl 1999 og hefur farsæld fylgt starfsemi hennar frá upphafi. Í byrjun sumars 2003 afhenti Oddfellowreglan líknardeildinni fullbúna kapellu í húsnæði við hlið deildarinnar.

„Enn á ný hefur Oddfellowreglan á Íslandi sýnt stórhug í verki, nú með því endurnýja ónotað húsnæði við hlið líknardeildarinnar þar sem rekin verður dagdeild fyrir þá einstaklinga sem þiggja líknandi meðferð og dvelja heima. Á dagdeildinni verður lögð áhersla á forvarnarstarf, meðferð og eftirlit einkenna ásamt endurhæfingu til að viðhalda sjálfsbjargargetu og stuðla að sem mestum lífsgæðum," segir tilkynningu Landspítalans.

Dagdeildin verður til að byrja með opin 3 daga í viku frá kl. 9-16. Einnig verður göngudeild opin einn morgun í viku með það að markmiði að stuðla að tengslum sjúklinga við sérhæfða líknarþjónustu fyrr í sjúkdómsferlinu. Síðar í haust hefst starfsemi 5 daga deildar sem verður opin mánudaga til föstudaga og mun starfsemi hennar auka möguleika á hvíldarinnlögnum og styttri legum til endurhæfingar og meðferðar erfiðra einkenna.