Yfir helmingur ók of hratt fram hjá Ingunnarskóla

Meira en helmingur ökumanna sem ók fram hjá Ingunnarskóla í hádeginu í gær ók of hratt og má eiga von á sekt. Eftir því sem fram kemur í frétt frá lögreglunni fóru 70 ökutæki um Kristnibraut í Grafarholti fram hjá skólanum á einni klukkustund og óku 39 þeirra of hratt.

Meðalhraði hinna brotlegu var liðlega 46 kílómetrar á klukkustund en sá sem hraðast ók var mældur á 61 kílómetra hraða. Á þessum hluta Kristnibrautar er 30 km hámarkshraði og er það merkt vel og greinilega.