Ekkert spurst til strokupilta

Lögreglunni á Húsavík hefur enn ekki borist neinar vísbendingar um piltana tvo sem struku frá meðferðarheimilinu í Aðaldal í gærkvöldi. Talið er að piltarnir hafi stolið bíl skammt frá heimilinu og hefur lögreglan lýst eftir bifreiðinni.

Ekkert hefur spurst til piltanna, sem báðir eru fimmtán ára gamlir, frá því í gærkvöldi. Fyrr í dag lýsti lögreglan á Húsavík eftir bifreið sem stolið var í nágrenni við heimilið. Líklegt þykir að piltarnir hafi stolið bílnum. Sporhundar röktu slóð piltanna að þjóðveginum en formlegri leit á svæðinu við meðferðarheimilið var hætt síðdegis í dag.

Hin stolna bifreið er af gerðinni Toyota Corolla árgerð 1992. Hún er ljósblá með númerið UT-493. Lögreglan á Húsavík biður alla þá sem verða varir við bifreiðina að hafa samband í síma 464-1303.