Strokupiltar taldir vera á stolinni bifreið

Talið er líklegt að piltarnir tveir sem struku frá meðferðarheimilinu Bergi í Aðaldali í gærkvöldi séu nú á stolnum bíl. Formlegri leit var hætt á svæðinu í kringum meðferðarheimilið síðdegis í dag eftir að sporhundur rakti slóð piltanna upp að þjóðvegi. Lögreglan lýsir eftir bifreið með númerið UT-493.

Samkvæmt tilkynningu frá lögreglunni á Húsavík hvarf bifreið sem stóð við Hafralækjaskóla í Aðaldal síðastliðna nótt eða um það leyti sem piltarnir struku frá meðferðarheimilinu. Að sögn lögreglunnar er talið líklegt að hvarf bifreiðarinnar tengist piltunum.

Piltarnir eru báðir fimmtán ára gamlir.

Bifreiðin er ljósblá af gerðinni Toyota Corolla árgerð 1992. Hún er með númerið UT-493. Lögreglan á Húsavík biður alla þá sem geta gefið upplýsingar um málið að hringja í síma 464-1303.