Sigurður Kári vill selja og einkavæða Íslandspóst

Einkavæða á og selja Íslandspóst segir Sigurður Kári Kristjánsson alþingismaður. Hann segir fyrirtækið seilast langt út fyrir starfssvið sitt með samkeppni við einkafyrirtæki.

Sigurður Kári, þingmaður Sjálfstæðisflokksins, segir að Íslandspóstur sé ríkisfyrirtæki og hann sé alls ekki sáttur við það sem hann kallar framtíðaráform þess sem snúist meðal annars um sölu á skrifstofuvörum, pappír og geisladiskum í samkeppni við einkaaðila.

Sigurður Kári segir að það sé hlutverk Íslandspósts að dreifa bögglum og bréfum til landsmanna. Hann segir ekki langt síðan Íslandspóstur hafi seilst út fyrir það verksvið sitt og keypt prentsmiðju sem fyrirtækið hafi stillt upp í samkeppni við einkaaðila.

Sigurður Kári segist algerlega andsnúinn því að ríkið sé í rekstri í samkeppni við einkaaðila, hvort sem það sé á ritfangamarkaði eða prentmarkaði. Hann segir að það sé langfarsælast að einkavæða fyrirtækið og selja það.