Byltingarkenndur íslenskur blöndungur sparar mikið bensín og dregur úr mengun

Nýr íslenskur blöndungur getur valdið byltingu í sparnaði á eldsneyti auk þess sem hann dregur verulega úr mengun. Markaður fyrir þessa íslensku uppfinningu er töluvert stærri en heimsmarkaður á nýjum bifreiðum.

Flestir kannast við vandræðin sem fylgja því að gangsetja venjulega sláttuvél. Þær hósta og hiksta og ætla aldrei í gang. Mökkurinn gengur líka aftur af þeim í stórum bólstrum.

Ástæðan fyrir því að sláttuvélar framtíðarinnar munu rjúka í gang í fyrsta starti er sú að með nýjum íslenskum blöndungi er eldsneytinu úðað með nýrri tækni inn í brunahólf mótorsins. Gamla lagið er þannig að því er sprautað inn og neistinn nær því illa að kveikja í eldsneytinu. Með nýja laginu hrekkur vélin í gang ísköld og miklu minni útblástur er frá henni.

Íslenska fyrirtækið Fjölblendir á heiðurinn af þessari nýju tækni. Markaðurinn fyrir þessa tegund blöndunga er gríðarlega stór enda knýja smávélar dælur, vélsagir, ljósavélar, sláttuvélar og jafnvel mótorhjól.

Það sem málið snýst um er lítið sakleysislegt tæki sem getur haft gríðarleg áhrif í bættri umgengni við umhverfið. Það er að verulegu leyti úr plasti. Þessi litli blöndungur gerir kleift að nýta eldsneyti allt að 20 prósent betur en þekkst hefur.

Allir aðilar sem hafa skoðað þessa lausn hafa undrast og sýnt henni mikinn áhuga að sögn Halldórs Kvaran framkvæmdastjóra hjá Fjölblendi.

Fjölblendir hefur þegar skráð markaðs- og einkaleyfi fyrir nýja blöndunginn og samningar um sölu á markaðsleyfum á blöndungnum ganga afar vel að sögn Halldórs.