Rafrænir lyfseðlar í gagnið á næstu mánuðum

Fram kemur í tilkynningu frá heilbrigðisráðuneytinu að prófanir á þessu kerfi hafi staðið yfir síðan árið 2001, fyrst á Húsavík og síðar á Akureyri og nærsveitum. Læknar og apótek sem hafa tekið þátt í tilrauninni telja mikinn ávinning af þessu fyrirkomulagi.

Ákveðið var að taka upp rafræna lyfseðla árið 2005 en innleiðingin hófst ekki fyrr vegna þess að ákveðið var að útfæra almenna samskiptaleið með heilbrigðisupplýsingar sem kæmi ekki eingöngu að notum fyrir lyfseðla heldur fyrir samskipti með heilbrigðisupplýsingar almennt. Sú samskiptaleið er nú tilbúin.

Helmingur lyfseðla verði sendur rafrænt í árslok

Fyrsti áfangi verkefnisins um rafræna lyfseðla nær yfir sendingar lyfseðla frá flestum heilsugæslustöðvum, heilbrigðisstofnunum og sjúkrahúsum landsins. Áætlað er að þessum áfanga ljúki á yfirstandandi ári eða í byrjun næsta árs. Í framhaldi af því verður opnað fyrir sendingar frá öðrum læknum. Heildarfjöldi lyfseðla árið 2004 var tæplega 1.900 þúsund og er markmið verkefnisins að um helmingur allra lyfseðla verði sendur með rafrænum hætti við lok ársins.

Fyrir sjúkling sem fer til læknis og fær lyfseðil breytist fyrirkomulagið þannig að í stað þess að fá í hendur pappírslyfseðil er lyfseðillinn sendur í lyfseðlagátt. Sjúklingurinn getur þá farið í hvaða apótek sem er og beðið um að fá lyfseðilinn afgreiddan. Sjúklingurinn getur einnig beðið um að lyfseðillinn sé sendur í ákveðið apótek, sem getur þá haft lyfin tilbúin þegar sjúklingurinn kemur.