Össur vill að Birkir líti í eigin barm

Össur Skarphéðinsson, iðnaðarráðherra, segir að framsóknarmenn hafi sjálfir beitt því vinnulagi sem notast var við í Grímseyjarferjumálinu. Hann undrist því hneykslun framsóknarmanna. Þetta kemur fram í pistli á heimasíðu Össurar en þar lýsir hann því einnig yfir að hann hyggist láta rannsaka aðkomu Birkis Jóns Jónssonar, framsóknarþingmanns, að Byrgismálinu svokallaða.

„Ef vinnubrögðin við Grímseyjarferjuna voru óalandi þá voru þau jafn óalandi þegar Framsókn beitt sömu vinnubrögðum í sínum ráðuneytum," segir Össur í pistlinum. Hann spyr hvort ekki sé réttast að „nota ferðina", ætli framsóknarmenn að knýja fram rannsókn á málinu á Alþingi, og skoða skyld dæmi úr ráðuneytum Framsóknarflokksins.

„Það finnst mér að minnsta kosti," segir Össur. „Þegar hinn norðlenski vonarpeningur framsóknarmaddömunnar, Birkir Jón Jónsson, leggur til rannsóknina á fjárreiðum ríkisins við þingsetningu í haust, gæti ég vel hugsað mér að skjóta inn breytingartillögu um það. Öruggt er að minnsta kosti að ég mun barna væntanlega rannsóknartillögu hans með því að leggja til að Birkir noti ferðina og láti rannsaka aðkomu hans sjálfs að Byrgismálinu - bæði sem formanns fjárlaganefndar og aðstoðarmanns félagsmálaráðherra - því auðvitað var hann á bólakafi í því máli öllu saman."

Ráðherrann lýkur máli sínu svo á þeim orðum að það verði ekki bæði sleppt og haldið.