Bjarni tekur upp hanskann fyrir Einar

Einar Hermannsson skipaverkfræðingur fól Bjarna Harðarsyni, þingmanni Framsóknarflokksins, að biðja Kristján L. Möller samgönguráðherra um rökstuðning á þeim orðum sem ráðherra hefur látið falla um Einar í tengslum við Grímseyjarferjumálið.

Einar var gestur á fundi fjárlaganefndar í morgun þar sem rætt var um Grímseyjarferjumál en eins og fram hefur komið hafa kaup og endurbætur á ferjunni farið langt fram úr áætlunum. Kristján L. Möller sagði eftir að skýrsla Ríkisendurskoðunar um málið var birt að Vegagerðin yrði að skipta um ráðgjafa þar sem ráðgjöfin í málinu hefði verið slæm, en það Einar Hermannsson sem veitti stjórnvöldum og Vegagerðinni ráð við ferjukaupin. Hann segir ráðherra hafa gert sig að blóraböggli í málinu.

Einar sagði í samtali við Vísi í dag að á fundi fjárlaganefndar hefði hann verið að fyglja eftir erindi sem hann sendi nefndinni vegna orða samgönguráðherra. Hann hefði viljað að fjárlaganefnd kæmist að niðurstöðu hver hans ábyrgð væri í málinu og hvort hún væri nokkur. „Nefndarmenn töldu hins vegar að það væri ekki á verksviði nefndarinnar að taka afstöðu til þess," segir Einar.

Einar segir enn fremur að á fundinum hafi einn nefndarmanna, Pétur Blöndal, bent honum á að hann gæti fengið þingmann til þess að taka málið upp í fyrirspurnartíma á Alþingi og fengið þannig rökstuðning fyrir orðum samgönguráðherra. Einar segist hafa beðið Pétur um að bera fram fyrirspurnina en fengið þau svör að það væri fremur stjórnarandstöðunnar að gera það. Bjarni Harðarson, fulltrúi Framsóknarflokksins í fjárlaganefnd, hafi gengist við því að bera fram fyrirspurnina.

Einar segist enn vænta þess og vona að ráðherra taki orð sín til baka. „Það kann vel að vera að hann hafi verið rangt upplýstur af sínum ráðgjöfum en þrátt fyrir allt sit ég enn þá undir orðum hans," segir Einar.