Einungis 13 prósent ferðamanna nýttu Strætó

Einungis 13 prósent ferðamanna sem heimsóttu Reykjavík síðastliðinn vetur nýttu sér Strætó. Þetta kemur fram í viðhorfskönnun sem gerð var fyrir Höfuðborgarstofu á fyrri hluta ársins. Könnunin leiddi enn fremur í ljós að rúmlega níu af hverjum tíu töldu reynsluna af borginni frábæra eða góða. Það er í samræmi við niðurstöður sem birst hafa síðustu úr sambærilegum könnunum síðustu ár.

Í ljósi þeirrar umræðu sem verið hefur í þjóðfélaginu á síðustu misserum var einnig spurt hvort ferðamenn teldu borgina örugga. Niðurstaðan var sú að 94 prósent þeirra sem stunduðu næturlífið töldu að Reykjavík væri örugg en aðeins eitt prósent var á öndverðum meiði.

Sundið og heilsuböð borgarinnar fengu hæstu meðaleinkunn eða 8,5 en verslanir fengu lökustu einkunnina eða 5,9. Hafði þar hátt verðlag mest að segja.

Í könnuninni var enn fremur spurt hvort fólk myndi mæla með Reykjavík sem áfangastað við aðra. Af þeim sem afstöðu tóku sögðust 95 prósent myndu mæla með Reykjavík og eru það mjög jákvæðar vísbendingar um áframhaldandi vöxt ferðaþjónustu á höfuðborgarsvæðinu, segir í tilkynningu Höfuðborgarstofu.

Könnunin var gerð í Leifsstöð frá janúar til maí 2007. Alls svöruðu 1486 ferðamenn könnuninni eða 81% þeirra sem fengu hana í hendur.