Olíufélögin hækka eigin álagningu á kostnað neytenda

Runólfur Ólafsson, framkvæmdastjóri FÍB, gagnrýnir olíufélögin harðlega fyrir að hækka bensínverð nánast samtímis um sömu krónutölu. Hann telur engar forsendur fyrir hækkunum olíufélaganna.

Framkvæmdastjóri FÍB segir engin rök til staðar fyrir nýjustu hækkunum olíufélaganna á eldsneyti.

Hann segir að miðað við þróun á verði olíu á heimsmarkaði og gengi krónunnar sé ekki hægt að álykta annað en að olíufélögin séu að hækka álagningu sína á kostnað neytenda.

Að sögn Runólfs hækkaði verðið á bensínlítranum og díselolíunni um tvær krónur fyrir helgina.

Runólfur finnur verulega að því að öll olíufélögin skuli sjá ástæðu til að hækka verðið á nánast samtímis um nákvæmlega sömu krónutölu.

Samúel Guðmundsson, framkvæmdastjóri hjá Olís, vísar gagnrýni FÍB á bug. Hann sagði í samtali við Stöð 2 í dag að hækkunin hér væri afleiðing af hækkun á heimsmarkaðsverði en olíuverð hefði farið upp um tugi dollara síðustu dagana.