Setja þarf reglur um ferðalög á hálendinu

Ómar Ragnarsson telur að æskilegt sé að setja reglur um ferðalög manna um hálendið til að tryggja öryggi þeirra. Setja þurfi upp kerfi sem geri einfalt að sjá hvar ferðamenn séu staddir í óbyggðum.

Slysavarnarfélagið Landsbjörg auglýsir eftir starfsmönnum í Fréttablaðinu í dag. Það vekur líklega litla athygli að starfið er erfitt, hættulegt og krefjandi, en hitt er nokkuð sérstakt að launin eru engin.

Stutt er síðan leitarmenn Slysavarnarfélagsins Landsbjargar lögðu sig í hættu við að leita tveggja Þjóðverja á Svínafellsjökli sem nú eru taldir af.

Hugmyndir Ómars Ragnarssonar um aukið eftirlit með ferðamönnum gæti leitt til þess að starf leitarmanna geti orðið marvissara við að finna fólk sem er týnt í óbyggðum.

Ómar bendir á að þrátt fyrir ævintýralega byltingu í fjarskiptum hafi atvikið á Svínafellsjökli verið ótrúlega líkt öðru árið 1907 þegar tveir Þjóðverjar hurfu sporlaust í Öskju. Í báðum tilvikum liðu vikur áður en uppgötvaðist að eitthvað hafði farið úrskeiðis.

Ómar segir að í þjóðgörðum erlendis sé vandlega fylgst með fólki sem þar er í gönguferðum og jafnel við miklu hættuminni aðstæður en hér á landi.

Í Yellowstone í Bandaríkjunum þurfi til dæmis leyfi til að ganga eftir göngustígum garðsins og göngufólk verði að halda nákvæmar tímaáætlanir.