60 prósent gætu losnað undan framtalsskyldu

Árið 2009 gefst almenningi kostur á því að sleppa við að fylla út hefðbundið skattframtal, en senda í staðinn nauðsynlegar upplýsingar til ríkisskattstjóra í gegnum heimabanka. Ríkisskattstjóri segir að þannig geti embættið talið fram fyrir allt að sextíu prósent landsmanna.

Stefnt er að því að hefja verkefnið í tveimur skattumdæmum árið 2009. Hugmyndin er sú að mönnum gefist tækifæri á að senda upplýsingarnar um tekjur, eignir og bankainnstæðu rafrænt í gegnum heimabankann. Þannig losna þessir aðilar við að útfylla skattframtalið en ríkisskattstjóri sér um að útbúa það fyrir þá.

Ekki er lagaheimiils fyrir ríkisskattstjóra að sækja bankaupplýsingarnar, þess vegna þurfa viðkomandi einstaklingar að tilkynna að upplýsingarnar megi nýta í þessum tilgangi.

Skúli Eggert Þórðarson ríkisskattstjóri segir fyrirkomulagið eingöngu fyrir launþega og aðila sem ekki standi í viðskiptum með hlutabréf og fasteignir.

Reiknað er með að allt að 60 prósent landsmanna geti að lokum nýtt sér þessa þjónustu og orðið lausir við framtalsskyldu. Skúli segir að ýmiss ávinningur sé af þessu fyrirkomulagi.

Skúli segir að með þessum hætti sé þjónusta við almenning bætt auk þess sem fækka megi áætlunum og skattskilin verði nákvæmari og betri með þessum hætti.