Police aldrei betri að mati Magna og félaga

Hljómsveitin Police er betri enn nokkru sinni fyrr. Þetta er samhljóma álit íslenskra tónlistarmanna sem sáu endurkomu sveitarinnar á tónleikum í Danmörku í gærkvöldi.

Hljómsveitarrígurinn var ekki til staðar þegar meðlimir sveitanna Á móti sól, Spútnik og Sóldögg dáðust að þremenningunum í Police; Sting, Andy Summers og Stewart Copeland. Rúmum 20 árum eftir blómatímabil sveitarinnar er hún á sögulegu tónleikaferðalagi. Danmörk var önnur stoppistöð í Evrópu, á eftir Stokkhólmi.

Kristján Gíslason, söngvari hljómsveitarinnar Spútnik, segir að tónleikarnir hafi verið frábærir, og að allir meðlimir Police hafi verið í „fantaformi".

Magni Ásgeirsson, söngvari hljómsveitarinnar Á móti sól, segir að Sting hafi aldrei sungið betur, og bætir við að tónleikarnir í Árósum í gærkvöldi hafi verið „mjög gott ball".