Öryggishliðið á Saga-class verður áfram ef flugfélögin greiða fyrir það

Höskuldur Ásgeirsson framkvæmdastjóri FLE á Keflavíkurflugvelli segir að öryggishliðið á Saga-class muni verða áfram ef flugfélögin séu tilbúin að greiða fyrir það. Björn Bjarnason dómsmálaráðherra segir á heimasíðu sinni að tilraunin með hliðið muni hafa leitt í ljós, að það sé ónauðsynlegt.

"Þetta var tilraunaverkefni til sex mánaða og í næstu viku munum við taka ákvörðun um framhaldið," segir Höskuldur í samtali við Vísi. "Það liggur ljóst fyrir að hliðið verður ekki áfram nema flugfélögin séu tilbúin að greiða fyrir það."

Aðspurður um hvort hann telji rétt að öryggishliðið verði áfram á Saga-class bendir Höskuldur á að á nær öllum alþjóðlegum flugvöllum í Evrópu sé svipað fyrirkomulag til staðar. "Í ljósi þess teldi ég eðlilegt að að hafa hliðið áfram," segir Höskuldur.

Aðspurður um viðbrögð við orðum dómsmálaráðherra um að hliðið sé ónauðsynlegt sagðist Höskuldur ekki vilja tjá sig um það. "Þetta var ákvörðun sem við tókum á sínum tíma og nú munum við endurmeta stöðuna," segir hann.