Úrbætur á háum FIT-kostnaði neytenda í bígerð

Gísli Tryggvason talsmaður neytenda segir að hann hafi nú lokið viðræðum við Guðjón Rúnarsson framkvæmdastjóra Samtaka banka og verðbréfafyrirtækja og fulltrúa fimm banka um FIT-kostnað neytenda. Gísli segir að nánar verði greint frá efni viðræðnanna á heimsíðu hans í vikunni en að úrbætur á háum FIT-kostnaði neytenda séu í bígerð.

"Þetta voru málefnalegar viðræður sem ég átti við þessa aðila, það er þrjá banka og tvo sparisóði og við fórum yfir þau atriði sem hægt er að bæta í garð neytenda hvað þennan kostnað varðar," segir Gísli Tryggvason í samtali við Vísi.

Aðspurður um hvort bankarnir hafi lofað bót og betrun segir Gísli að hann vilji ekki tjá sig nánar að svo stöddu. Hann muni greina frá niðurstöðu viðræðnanna í næstu viku.