FÍB telur engar forsendur fyrir hækkunum olíufélaganna

Runólfur Ólafsson framkvæmdastjóri FÍB segir að samtökin telji engar forsendur og rök til staðar fyrir nýjustu hækkunum olíufélaganna á bensíni og olíu. Runólfur segir að miðað við þróun á verði olíu á heimsmarkaði og gengi krónunnar sé ekki hægt að álykta annað en að olíufélögin séu að hækka álagingu sína.

Verðið hækkað hjá öllum um 2 krónur á líter á bensíni og díselolíu nú fyrir helgi. Runólfur gerir einnig að umtalsefni að öll stóru félögin þrjú hafi hækkað bensín og olíu um sömu krónutölu eins og nær ávallt gerist. Slíkt þekkist ekki í jafnmiklum mæli erlendis.

Runólfur bendir á að þegar bensín og olía var hækkuð síðast í byrjun ágúst hafði gengið veikst töluvert. Nú hefur gengið aftur á móti styrktst á ný. "Það var að vísu lækkun upp á eina krónu í millitíðinni en hækkunin nú upp á tvær krónur á sér ekki forsendur nema að verið sé að hækka álagninguna," segir Runólfur.