Best að taka Austur-Grænland inn í haustrallið

Jóhann Sigurjónsson forstjóri Hafrannsóknarstofnunnar segir að stofnunin hafi töluverðann áhuga á að senda rannsóknarskip á miðin við Austur-Grænland til að kanna hina miklu þorskgengd sem þar virðist vera. Jóhann segir að best væri að samræma slíkan leiðangur við haustrall stofnunarinnar í byrjun október.

"Þorskstofninn við Grænland hefur ekki verið svipur hjá sjón miðað við það sem hann var fyrir nokkrum áratugum þó merki séu um að árgangurinn frá 2003 sé nokkuð sterkur," segir Jóhann. "Það er svo spurning hvort uppistaðan í þeim árgangi séu seiði frá Íslandsmiðum. Okkur finnst ástæða til að kanna þetta, merkja fisk á þessum miðum og taka sýni."

Jóhann segir að óhappið þegar stýrið datt af Bjarna Sæmundssyni muni ekki raska áætlunum stofnunarinnar að neinu ráði. Bjarni ætti að vera orðinn sjófær í septemberlok en hann er á leiðinni í áður fyrirhugaða slipptöku á Akureyri þar sem einnig verður gert við bilanir í stýri.