Seltjarnarnesbær býður börnum og unglingum tómstundastyrki

Öllum börnum og ungmennum á aldrinum 6-18 ára á Seltjarnarnesi stendur nú til boða 25 þúsund króna tómstundastyrkur til að stunda skipulagt íþrótta-, tómstunda- og æskulýðsstarf. „Býður þessi styrkur börnum upp á aukið valfrelsi, fjölbreytni og stuðlar að jafnrétti í samfélaginu. Þar sem styrkirnir lækka útgjöld heimilanna, vonast bæjaryfirvöld til að tómstundastyrkirnir verði hvati fyrir börn að stunda það íþrótta-, tómstunda- eða æskulýðsstarf sem mestan áhuga vekur hjá þeim," segir í tilkynningu frá Seltjarnarnesbæ.

Jónmundur Guðmarsson bæjarstjóri Seltjarnarness segir að með ákvörðun bæjarstjórnar um tómstundastyrki verði Seltjarnarnes það sveitarfélag sem greiðir bæði hæstu tómstundastyrkina og til breiðasta hópsins á landinu með tilliti til valfrelsis. Bæjarstjóri segir tómstundastyrkina hafa verið meðal mikilvægust stefnumála núverandi meirihluta fyrir síðustu kosningar og því sé einkar ánægjulegt að sjá þá í höfn.