Sápa sett í nýja gosbrunninn í Reykjanesbæ

Einhverjir framtakssamir einstaklingar tóku sig til í kvöld og settu mikið magn af sápu í nýja gosbrunninn við Vatnestorg í Reykjanesbæ rétt fyrir klukkan átta í kvöld. Sápan freyddi út á torgið og skapaðist mikið umferðaröngþveiti í kjölfar uppátækisins. Kalla þurfti til slökkvilið sem sprautaði sápunni í burtu. Lögreglan í Reykjanesbæ segir brunninn stórhættulegan.

Brunnurinn var gangsettur fyrr í dag við hátíðlega athöfn en hann er samsettur af 12 stútum sem mynda tveggja metra radíus og lýsa tvö ljós hvern stút upp. Að sögn vakstjóra hjá lögreglunni í Reykjanesbæ sem Vísir talaði við eru menn þar á bæ afar ósáttir við brunninn sem þeir segja vera slysagildru. „Það sést ekki ofan í brunninn en á botni hans eru fjölmörg oddhvöss járn," segir lögreglumaðurinn. „Við höfum virkilegar áhyggjur af því að börn slasi sig þarna og ég veit að sumir bæjarstarfsmenn deila þeim áhyggjum með okkur."