Samgöngubætur í Norðurárdal

Fjórar einbreiðar brýr, nokkrar blindhæðir og hættulegar beygjur heyra sögunni til þegar nýbyggingu þjóðvegar eitt í Norðurárdal í Skagafirði lýkur í haust.

Kaflinn, sem er endurbyggður, er fjórtán og hálfur kílómetri að lengd og er að mati kunnugra ómetanleg samgöngubót, þótt hún stytti norðurleiðina ekki. Verkið hefur gengið vel og er á undan áætlun. Þannig tókst Héraðsverki, sem er verktakinn, að opna helming leiðarinnar fyrir ferðamannatímabilið í vor og umferð verður hleypt á hinn helminginn eftir tíu til tólf daga.

Að sögn Sigurðar Grétarssonar framkvæmdastjóra Héraðsverks, er svo stefnt að því að öllum frágangi, að girðingum meðtöldum, verði lokið fyrr fyrsta oktober. Gamli vegurinn verður svo reiðvegur, en slíkt hefur bráðvantað á þessum slóðum og hefur umferð hestamanna um gamla þjóðveginn enn aukið á hættuna í umferðinni þar.