Eitt af eldri húsum á Akureyri verður rifið

Eitt af eldri húsum miðbæjarins á Akureyri verður rifið á næstu vikum. Íbúi segir stórslys í uppsiglingu en húsið hefur staðið í niðurníðslu um langa hríð.

Húsið er 84 ára gamalt en innan tíðar verður það jafnað við jörðu og annað hús, mun hærra, byggt í staðinn. Um þetta eru skiptar skoðanir og segir Ágúst Þór Árnason íbúi að stórslys sé í vændum, takist ekki að bjarga húsinu.

Mörg hús í miðbænum hafa fengið andlitslyftingu undanfarið og skjóta örlög hússins skökku við í því ljósi, segir Ágúst. Hann hefur skorað á íbúasamtökin Akureyri í öndvegi að beita sér fyrir málinu. Vignir Þormóðsson sem fer fyrir þeim sem ætla að reisa nýtt hús á lóðinni segir að ekkert geti komið í veg fyrir niðurrif hússins úr þessu. Hann bendir á að efri hæðirnar hafi staðið auðar í tæp 20 ár og hafi enginn sýnt áhuga á öllum þeim tíma að gera húsið upp. Betra sé að reisa nýtt hús sem bæjarsómi verði að en hafa þetta gamla hús áfram í niðurníðslu.

15 íbúðir verða í nýja húsinu auk þess sem bakaríið fær andlitslyftingu og þá munu Vinstri grænir áfram hafa þarna skrifstofun á neðstu hæðinni.