Grunur um að kveikt hafi verið í sófa

Grunur leikur á að kveikt hafi verið í sófa að Stuðlum með þeim afleiðingum að tvær stúlkur voru fluttar á sjúkrahús og húsið skemmdist töluvert. Rannsókn málsins stendur yfir og er búist við að stúlkurnar tvær verði yfirheyrðar síðar í dag.

Eldurinn kom upp um þrjúleytið í gær í sófa í sameiginlegu rými sjúklinga á neyðarvistun meðferðarheimilisins. Tveimur stúlkum sem voru staddar í svefnherbergi inn af rýminu var bjargað af slökkviliði og þær fluttar á slysadeild með reykeitrun og brunasár.

Starfsmaður á meðferðarheimilinu hafði verið með stúlkunum rétt áður en eldurinn kom upp en þurfti að yfirgefa þær stutta stund. Á meðan blossaði eldurinn upp og reyndi starfsmaðurinn að slökkva hann en varð svo frá að hverfa. Hann fór síðan sjálfur á slysadeild og fékk aðhlynningu vegna reykeitrunar.

Slökkviliðið slökkti eldinn á um þrjátíu mínútum og eldurinn náði ekki að breiðast út til annarra herbergja á meðferðarheimilinu. Miklar skemmdir urðu á neyðarvistuninni og töluverðar reykskemmdir á húsinu öllu.

Starfsmenn meðferðarheimilisins grunar stúlkurnar um að hafa kveikt í að því er segir í skýrslum lögreglu sem teknar voru af þeim. Málið er í rannsókn hjá rannsóknardeild sérrefsilagabrota lögreglunnar. Að því er fram kom í Fréttablaðinu í morgun þá var rætt stuttlega við stúlkurnar í gær. Lögreglan segir þó að þær hafi enn ekki verið yfirheyrðar. Það verði líklega gert síðar í dag.