Bílstjórinn hafi brugðist hárrétt við

Framkvæmdastjóri næststærsta rútubílafyrirtækis landsins segir að bílstjórinn sem lenti í slysi í Bessastaðafjalli í gærdag hafi brugðist hárrétt við í erfiðum aðstæðum.

Gunnar Gunnarsson, framkvæmdastjóri SBA-Norðurleiða, er sjálfur atvinnubílstjóri og hefur marga fjöruna sopið í hópbílaakstri. Hann segir að það hljóti að vera martröð sérhvers bílstjóra að lenda í því að bremsur bili á fjallvegi en það virðist hafa gerst fyrir austan í gær.

Gunnar telur að bílstjórinn hafi brugðist rétt við ef rétt sé að bremsurnar hafi verið farnar eða mjög slitnar. Það hafi verið skynsamlegast að fara út af í fyrstu beygju heldur en að reyna að ná beygjunni. Ástandið hefði bara versnað eftir því sem neðar hefði dregið.

Aðspurður telur hann menn hafa sloppið vel miðað við aðstæður á slysstað.