Snúa flestir aftur til vinnu í vikunni

Flestir starfsmanna Arnarfells sem lentu í rútuslysinu í Bessastaðabrekku á Fljótsdalsheiði í gærdag snúa til vinnu síðar í vikunni. Slysið hefur ekki áhrif á gang framkvæmda á vegum fyrirtækisins.

Þrjátíu og einn maður frá Póllandi, Rússlandi og Lettlandi var í rútunni sem fór út af veginum í Bessastaðabrekku. Rútan hafnaði á klettavegg þannig að talsvert tjón hlaust af.

Sextán menn voru fluttir á sjúkrahús, þar af níu til Reykjavíkur og voru tveir þeirra alvarlega slasaðir en ekki lífshættu. Að sögn Gísla Rúnars Rafnssonar, staðarstjóra Arnarfells við Hraunaveitu í Fljótsdal, þar sem mennirnir unnu, munu flestir mannanna snúa aftur til vinnu eftir tvo til þrjár daga.

Að sögn Gísla er nú komið í ljós að fjórir menn sem fluttir voru á Heilbrigðisstofnun Austurlands eru ekki brotnir og þá eru tveir menn sem fluttir voru til Akureyrar á sjúkrahús ökklabrotnir. Tveir af þeim níu sem fluttir voru til Reykjavíkur hafa nú verið útskrifaðir en ekki liggur fyrir hvenær hinir verða það.

Gísli Rúnar segir að þeir sem meiðst hafi meira í slysinu snúi til baka þegar þeir hafi verið útskrifaðir af sjúkrahúsi. „Þetta er þeirra heimili og hjá okkur fá þeir eins góða þjónustu og unnt er og í samræmi við ráðleggingar lækna," segir Gísli Rúnar í samtali við Vísi.

Aðspurður segir Gísli að slysið hafi ekki áhrif á framkvæmdir Arnarfells við Hraunaveitu í Fljótsdal þar sem mikill fjöldi starfi nú fyrir fyrirtækið á svæðinu. Alls vinna nú 320 manns fyrir Arnarfell við sprengingu og borun veituganga Jökulsár í Fljótsdal, byggingu Ufsastíflu og Keldárstíflu og við gerð svokallaðs lokuhúss á svæðinu. Framkvæmdum á að vera lokið 2009.