Vinna að útbreiðslu og lögleiðingu pókers

Nýstofnað Pókersamband Íslands opnaði formlega í dag heimasíðu sína en sambandið vinnur að útbreiðslu pókers og lögleiðingur mótapókers. Forseti sambandsins segir inni í myndinni að sækja um aðild að ÍSÍ.

Pókersamband Íslands var stofnað í byrjun júlí en samkvæmt tilkynningu frá sambandinu er meginmarkmiðið þess að stuðla að því að áhugamannapóker í heimahúsum og mótapóker verði löglegur á Íslandi.

Eins og fram kom í fréttum fyrr í sumar stöðvaði lögregla pókermót á vegum gismo.is og gerði ýmislegt upptækt. Davíð Hansson, forseti Pókersambandsins, segir að til hafi staðið að stofna sambandið en þær aðgerðir flýtt fyrir því að sambandið var stofnað. „Við hvetjum alla áhugasama til að skrá sig í félagið á síðunni og stuðla þannig að eflingu og uppgangi íþróttarinnar á Íslandi og mynda öflugt samfélag áhugamanna um póker," segir Davíð.

Davíð segir að samkvæmt gildandi lögum séu pókermót eins og það sem haldið var fyrr í sumar á gráu svæði og það þurfi að fá á hreint hvort pókermót séu lögleg eða ekki. Beðið sé eftir því hvot lögregla hyggist leggja fram ákæru vegna mótsins en samkvæmt hans upplýsingum sé hún ekki enn komin fram.

Ekker ólíkt móti í Hornafjarðarmanna

Flestir lögfræðingar sem forsvarsmenn sambandsins hafi rætt við séu þeirrar skoðunar að pókermót séu ekkert öðruvísi en mót í Hornafjarðarmanna þar sem greiddur er aðgangseyrir og verðlaun veitt. Þá styðji nýfallinn dómur í Danmörku í sambærilegu máli málstað pókermanna en þar var formaður danska pókersambandsins sýknaður af ákæru um að hafa skipulagt fjárhættuspil með því að standa að pókermóti sem er sambærilegt við það sem gismo.is hélt hér á landi.

Talsmenn pókersins hafa líkt honum við skákíþróttina og benda á að í skákinni skrái menn sig til leiks á mótum og geti unnið verðlaunafé. Aðspurður hvort til greina komi að sækjast eftir inngöngu í Íþrótta- og Ólympíusamband Íslands segir Davíð að það sé inni í myndinni. „Við viljum gera það sem þarf til þess að fá viðurkenningu á þessari íþrótt. Þetta er ekkert ólíkt skákinni ef fólk kynnir sér þetta. Bestu menn í heimi í póker eru ekki heppnustu menn í heimi," bendir Davíð á.