Tuttugu krakkar fluttir í athvarf í nótt

Lögregla þurfti að flytja rúmlega tuttugu unglinga í sérstakt athvarf á Menningarnótt. Þetta mun vera svipaður f´jöldi og í fyrra. Foreldrum krakkana var gert að sækja þau en að sögn lögreglu var ástand sumra barnanna mjög slæmt sökum ölvunar.

Í tilkynningu frá lögerglu segir að hópur svæðislögreglumanna hafi haldið úti öflugu eftirliti í gærkvöld og nótt en tilgangur þess var að vinna gegn ólöglegri útivist og áfengisdrykkju.

„Afskipti voru höfð af yfir 100 unglingum en þeir sem höfðu ekki aldur til að vera úti við var vísað heim eða færðir í athvarf," segir lögreglan og er því bætt við að miklu magni af áfengi hafi verið hellt niður.

„Almennt séð var ekki mikið um brot á lögum um útivistartíma en þeim mun meira um brot á áfengislögum," segir í tilkynningunni. Lögregla vill samt taka fram að almennt séð séu lögreglumenn nokkuð sáttir með ástandið í nótt þrátt fyrir að ölvun hafi vissulega verið töluverð.