Kvikmyndagerðarmenn vilja fund með útvarpstjóra

Hjálmtýr Heiðdal formaður Félags kvikmyndagerðarmanna segir að FK vilji fá fund með útvarpstjóra hið fyrsta. Á fundi FK í vikunni var m.a. rætt um þjónustusamning þann sem menntamálaráðherra gerði við RUV um framleiðslu á innlendu efni. Á fundinum kom fram að félagsmenn FK telja ófært að óvissa ríki um útfærslu á samningnum og eftirlit með honum.

Þjónustusamningur sá sem hér um ræðir gerðir ráð fyrir að RUV fá 150 milljónir kr. til framleiðslu á innlendu efni frá sjálfstæðum framleiðendum í ár og síðan vaxi upphæðin árlega og verði 250 milljónir kr. eftir þrjú ár.

Þórhallur Gunnarsson dagskrárstjóri RUV segir að upphæðin í ár sé uppurin eða eyrnamerkt kaupum á innlendu efni frá sjálfstæðum framleiðendum. Nefnir hann sem dæmi Eurovision og Gettu betur auk kaupa RUV á heimildamyndum.

Hjálmtýr segir að heimildamyndagerð innanlands sé í krísu vegna þess hve illa gangi að fá fjármagn til hennar. Og nú borgi RUV aðeins 5-15% af kostnaði við heimildarmyndir gegn því að fá frumsýningarréttinn. "Við viljum ræða við útvarpstjóra og fá hjá honum breiðari línur um hvernig nýta eigi þennan þjónustusamning næstu þrjú árin," segir Hjálmtýr.