Alcan ætlar að kæra mótmælendur

Alcan ætlar að kæra þá meðlimi samtakanna Saving Iceland sem mótmæltu við álver fyrirtækisins í Straumsvík í gær. Fjármálastjóri fyrirtækisins segir lögfræðinga fyrirtækisins vera vinna í málinu.

„Við munum leggja fram kæru. Ég fékk lögfræðinga okkar til að fara í málið í morgun," sagði Sigurður Þór Ásgeirsson, fjármálastjóri álversins í Straumsvík, í samtali við Vísi.

Um 20 mótmælendur á vegum samtakanna Saving Iceland mótmæltu í gær fyrir framan álverið í Straumsvík. Þrír hlekkjuðu sig við hlið að vinnusvæðinu og náðu tímabundið að loka fyrir alla umferð að álverinu. Þá fóru nokkrir inn á vinnusvæðið sjálft til að mótmæla.

Lögreglan handtók 13 mótmælendur og voru þeir yfirheyrðir í gær. Tveir af þeim eru Íslendingar en hinir með erlent ríkisfang. Þeim var sleppt eftir yfirheyrslu í gærkvöldi.

Að sögn Sigurðar liggur ekki fyrir hversu mikið tjón varð að völdum mótmælanna. Hann segir þó einhverjar tafir hafa orðið vegna þeirra.