Fiski ekið þúsund kílómetra til vinnslu á Þingeyri

Fiskur sem er unninn á Þingeyri er veiddur úti fyrir austfjörðum og fluttur landleiðina meira en þúsund kílómetra. Forkólfar Vísis hf. á Þingeyri segja úrslitaatriði að bæta vegakerfið á Vestfjörðum til að tryggja gæði hráefnis. Forvígismenn Vísis hf. vinna upp kostnað við flutningana með verkþekkingu og afköstum á Þingeyri.

Hraðfrystihús Vísis hf. á Þingeyri leggur áherslu á að vinna afurðir úr ýsu og er hluti hennar heilfrystur. Skapast hefur mikil verkþekking á Þingeyri auk þess sem vinnslan er vel tækjum búin en lausnir eru frá tveimur íslenskum þekkingarfyrirtækjum 3X á Ísafirði og Marel tryggja mikla sjálfvirkni og góða nýtingu.

Það sem er einstakt fyrir framleiðsluna á Þingeyri er að að hráefnið er flutt landleiðina alla leið frá Djúpavogi.

Fiskur sem unninn er á Þingeyri er veiddur út af Djúpavogi og það tekur aðeins tvo tíma fyrir bátinn að stíma í land frá miðunum. Þá tekur við löndun og akstur eftir misgóðum þjóðvegum landsins.

Ekið er upp á Hérað, um Þingeyjasýslu og í Eyjafjörð, um Skagafjörð og Húnavatnssýslu og norður Strandir. Þá er farið yfir Steingrímsfjarðarheiði og út Djúpið, í gegnum Vestfjarðagöng og um Önundarfjörð til Dýrafjarðar.

Heildarvegalengdin er um þúsund kílómetrar og varla er hægt að fara lengri leið með fiskinn á þjóðvegunum í einni lotu. Á góðum degi tekur aksturinn um 12 klukkutíma.

Fiskur unninn á Þingeyri fer á diskana hjá neytendum í Bandaríkjunum og Evrópu. Hann er tekinn með trukki suður til Reykjavíkur, liðlega 500 kílómetra leið, honum er útskipað og hann fluttur til Rotterdam, sem er í liðlega 2000 kílómetra fjarlægð frá Reykjavík, til frekari dreifingar í Evrópu. Hann er einnig fluttur og til Boston í Bandaríkjunum, í nálega 4000 kílómetra fjarlægð frá Reykjavík.

Það er því óhætt að segja að fiskurinn frá Vísi fari víða.