Á 115 kílómetra hraða á Sæbraut

Lögreglan í Reykjavík tók tuttugu og sjö ökumenn fyrir hraðakstur á höfuðborgarsvæðinu í gær. Grófasta brotið var framið á Sæbraut en þar mældist bíll á 115 km hraða. Ökumaðurinn, karlmaður á fertugsaldri, verður sviptur ökuleyfi. Annars gekk umferðin að mestu leyti vel fyrir sig. Sextán umferðaróhöpp voru tilkynnt til lögreglunnar á höfuðborgarsvæðinu. Telst það í minna lagi.

 

Lögreglan hafði einnig afskipti af nokkrum ökumönnum í gær sem ekki höfðu látið skoða bíla sína. Einn ökumaður var stöðvaður fyrir að aka um á nagladekkjum í gær en viðkomandi, sem er rúmlega hálfþrítugur karlmaður, bar við vankunnáttu á umferðarlögum. Málsvörn hans kom að litlu gagni og maðurinn fær sekt eins og aðrir sem brjóta gegn þessu ákvæði.

 

Þá stöðvaði lögreglan för þrítugs karlmanns sem var með sjö farþega í bíl sínum þó aðeins væru sæti og bílbelti fyrir fjóra farþega.