Hafa áhyggjur af niðurskurði í þorskveiðum

Bæjarstjórn Fjallabyggðar hefur áhyggjur vegna ákvörðunar sjávarútvegráðherra um stórfelldan niðurskurð í þorskveiðum á næsta ári. Telja þau um svo mikinn samdrátt að ræða að við blasi neyðarástand í sjávarbyggðum víða um land.

„Tekjusamdráttur veiða og vinnslu er gífurlegur og hætt er við að fólk missi lífsviðurværi sitt og fólksflótti verði frá landsbyggðinni. Þá eru ótalin þau fyrirtæki sem þjónusta sjávarútveg. Þeirra starfsgrundvöllur er líka í hættu.

Bæjarstjórn Fjallabyggðar lýsir fullri ábyrgð á hendur ríkisstjórninni og kallar eftir skýrum svörum um mótvægisaðgerðir. Þá er ekki eingöngu átt við samgöngu- og fræðslumál. Þau eru góðra gjalda verð en létt í vasa þeirra sjómanna eða landverkafólks sem missa vinnuna, eða verða fyrir svo stórfelldri kjaraskerðingu sem hér er á döfinni," segir í ályktun frá bæjarstjórn Fjallabyggðar.