Þrjú á gjörgæslu eftir kappakstur

Tveir piltar og stúlka liggja alvarlega slösuð á gjörgæsludeild Landspítalans eftir kappakstur tveggja bíla á Geirsgötu sem endaði með árekstri við Hamborgarabúllu Tómasar. Ungmennin voru í bíl sem ekið var vestur Geirsgötu í kapp við annan bíl um tvöleytið í nótt.

Ökumaður bílsins, 18 ára piltur, missti stjórn á honum í beygjunni við Hamborgarabúllu Tómasar og flaug bíllinn inn á bílastæðið við Búlluna. Þar lenti hann framan á kyrrstæðum bíl og kastaðist þaðan á Búlluna sjálfa. Höggið var svo mikið að lögreglumenn við eftirlitsstörf við höfnina heyrðu þegar bíllinn skall á húsinu. Þeir kölluðu eftir aðstoð og þurftu slökkviliðsmenn að beita klippum til að losa ökumanninn úr bílnum.

Hann og stúlka sem var farþegi í bílnum voru lögð inn á gjörgæsludeild og að sögn vakthafandi læknis þar eru þau alvarlega slösuð. Piltur sem var farþegi í bílnum fór í aðgerð vegna meiðsla sinna í nótt og eftir hana var hann jafnframt lagður inn á gjörgæsludeild.

Ekki liggur fyrir hversu hratt ungi maðurinn ók þegar slysið varð en að sögn Margeirs Sveinssonar hjá rannsóknarsviði umferðardeildar var hann á ofsahraða miðað við hámarkshraða á staðnum sem er 50 kílómetrar á klukkustund. Ekki liggur fyrir hvort pilturinn og sá sem tók þátt í kappakstrinum á hinum bílnum verða ákærðir fyrir uppátækið en málið er í rannsókn.

Lögregla lokaði veginum í nokkurn tíma vegna slyssins með því að leggja lögreglubíl þvert á veginn. Einn ökumaður lét hins vegar ekki segjast og ók fram hjá honum og stöðvaði lögregla hann. Reyndist hann vera ölvaður.