Sárið morandi í lirfum

Öldruð kona sem legið hefur rúmföst árum saman var flutt ásamt eiginmanni sínum á spítala fyrir þremur dögum eftir að nágrannar höfðu fundið megna ólykt frá íbúð þeirra. Aðkoman var skelfileg en þau gatu enga björg sér veitt. Konan var með sár á fæti sem var alsett lirfum.

Heimildum ber ekki alveg saman um hversu alvarlegt mál þetta er og hvort hægt sé að rekja þetta ástand að einhverju leyti til afkiptaleysis heimahjúkrunar og Félagsþjónustu. Heimildum ber þó saman um að þessi öldruðu hjón hafi verið afar treg til að þiggja þjónustu og því verið nokkuð afskipt. Konan sem er á áttræðisaldri hefur verið rúmföst árum saman en eiginmaður hennar sem er nokkuð eldri hefur getað sinnt henni - eða þar til hann veikist nú í vor.

Það er svo fyrir þremur dögum sem nágrönnum fólksins ofbýður svo ólyktin sem berst úr íbúðinni að kallað er eftir aðstoð og farið þar inn. Aðkoman var skelfileg og hafði fólkið ekki komist til að gera þarfir sínar á klósett svo dæmi sé tekið. Þegar konan var flutt á Landsspítala, háskólasjúkrahús kom í ljós að hún var með sár á fótum og höfðu sárabindin verið á þeim í nokkurn tíma. Undir umbúðunum í sárunum grasseruðu flugnalirfur. Samkvæmt heimildum fréttastofu voru þessar lirfur ef til vill konunni til happs því þær átu dautt skinn og héldu sárinu hreinu. Í seinni tíð er jafnvel svipaðar lirfur notaðar á sjúkrahúsum til að hreinsa sár.

Eftir því sem næst verður komist heilsast þessu fólki ágætlega á sjúkrahúsinu og getur snúið innan tíðar til síns heima það er eftir að búið er að hreinsa íbúð þeirra. Sagan hefur þó orðið starfsfólki í heilbrigðisgeiranum til umhugsunar um hversu algengt er að gamallt fólk sé heimavið í skelfilegum kringumstæðum án þess að þeim sé boðin þjónusta eða hún þegin.