Dalfoss skal skipið heita

Nýtt frystiskip Eimskips var nefnt Dalfoss við hátíðlega athöfn í Sundahöfn í dag. Þetta er í fyrsta skiptið sem skip er nefnt í Sundahöfn og var tekið á móti gestum á athafnasvæði Eimskips á höfninni af því tilefni. Baldur Guðnason, forstjóri Eimskipa, sagði við þetta tækifæri að skipið gæfi fyrirtækinu gott samkeppnisforskot í kæli- og frystiflutningum en fyrirtækið hefði náð leiðandi stöðu á alþjóðavísu á því sviði.

Dalfoss er bæði frysti- og gámaskip, er 82 metra langt og 16 metra breitt og er það sérstaklega styrkt til siglinga í ís. Skipið verður í rekstri hjá dótturfélagi Eimskip, Eimskip-CTG í Noregi, og hefur sú hefð myndast að öll skip í eigu Eimskip-CTG eru skírð eftir fossum sem bæði eru staðsettir í Noregi og á Íslandi, segir í fréttatilkynningu frá Eimskip.