Guðlaugur Þór inn - Sturla út

Ein breyting varð á ráðherrahóp sjálfstæðismanna. Guðlaugur Þór Þórðarson kemur nýr inn og verður heilbrigðisráðherra en Sturla Böðvarsson lætur af embætti samgönguráðherra og verður forseti Alþingis. Sturla kveðst fremur hafa kosið að vera áfram ráðherra.

Flokksráð Sjálfstæðisflokksins samþykkti ríkisstjórnarþátttöku og stjórnarsáttmála með dynjandi lófataki á fjörutíu mínútna löngum fundi í Valhöll. Að honum loknum kom þingflokkur sjálfstæðismanna saman og samþykkti stjórnarsamstarfið sem og tillögu formanns flokksins um ráðherraskipan. Niðurstaðan var svo tilgreind opinberlega þegar á níunda tímanum. Athygli vakti að eftir yfirlýsingu sína í Valhöll gekk Geir af vettvangi og forðaðist að svara spurningum fréttamanna. Guðlaugur Þór Þórðarson er eini nýliðinn í ráðherraliði Sjálfstæðisflokksins en hann verður heilbrigðisráðherra. Hann segir að menn hafi rætt um og finnist skynsamlegt að nýta kosti einkareksturs á þessu sviði sem og öðrum. Menn séu þó ekkert að hvika frá þeirri grundvallarreglu að menn eigi að geta notið þjónustunnar óháð efnahag.

Þótt engar yfirlýsingar hefðu verið gefnar um breytingar á ráðherraskipan á kjörtímabilinu er almennt búist við að Björn Bjarnason sitji ekki út kjörtímabilið. Björn segir það hugsanlegt en ekkert hafi verið tilkynnt um það í þessari andrá núna. Hann segir það koma í ljós hvað hann verði lengi. Hann geti einnig orðið önnur kjörtímabil, ef svo beri undir.

Sturla Böðvarsson leyndi ekki vonbrigðum sínum en hann hættir sem samgönguráðherra og verður forseti Alþingis. Hann kveðst þó fremur hafa kosið að vera áfram ráðherra. Hann virði hins vegar niðurstöðuna. Það að vera forseti Alþingis Íslendinga sé verkefni sem hver og einn geti verið stoltur af.

Einar K. Guðfinnsson verður áfram sjávarútvegsráðherra en bætir við sig landbúnaðarráðuneytinu. Hann segir það að mikil áherslan verði lögð á það að standa vörð um hagsmuni landbúnaðarins en um leið verði stefnt að því að lækka vöruverð í landinu. Stóra málið sé þó það að menn vilji hafa öflugan landbúnað. Um það sé enginn ágreiningur.