Frestaði því að ráða í starf ríkissaksóknara

Björn Bjarnason, dómsmálaráðherra, hefur frestað því að ráða í starf ríkissaksóknara til næstu áramóta. Fyrirhugað var að nýr maður tæki við starfinu 1. júlí og eru umsækjendur um stöðuna missáttir.

Á vef dómsmálaráðuneytisins kemur fram að samkomulag hafi náðst milli Björns Bjarnasonar, dómsmálaráðherra, og Boga Nilssonar, ríkissaksóknara, um að Bogi sinni starfinu til næstu áramóta. Til stóð að Bogi léti af embættinu 1. júlí næstkomandi.

Nokkuð er síða að starfið var auglýst laust til umsóknar en frestur til að sækja um rann út 27. apríl. Fimm sóttu um stöðuna:

Hæstaréttarlögmennirnir Brynjar Níelsson og Jóhannes Rúnar Jóhannsson, saksóknararnir Egill Stephensen og Sigríður Friðjónsdóttir og Jón H. B. Snorrason, varalögreglustjóri á höfuðborgarsvæðinu.

Jóhannes Rúnar dró umsókn sína til baka og gaf meðal annars þá ástæðu að hann teldi að þegar væri búið að ráðstafa embættinu.

Upphaflega stóð til að ráða í starfið öðrum hvorum megin við kosningahelgina, eftir að umsækjendur höfðu mætt í starfviðtöl, en ráðherra frestaði því. Hann gaf þær skýringar að fara þyrfti betur yfir umsóknirnar til þess til þess að fullnægja góðum stjórnsýsluháttum.

Brynjar Níelsson sagði í samtali við fréttastofu að hann væri ósáttur við málsmeðferð ráðherra. Hann hefði engar skýringar fengið á frestuninni og hann biði eftir þeim. Egill Stephensen sagðist vera að kanna stöðu sína en að öðru leyti vildi hann ekki tjá sig um málið. Ekki náðist í Sigríði Friðjónsdóttur í dag vegna málsins en Jón H. B. Snorrason hafði ekkert um málið að segja þegar leitað var eftir viðbrögðum hans. Fréttastofan reyndi í dag að leita eftir skýringum hjá Birni Bjarnasyni á frestuninni en ekki náðist í hann.

Embætti ríkissaksóknara verður auglýst að nýju síðar á árinu. Enginn umsækjendanna gat svarað til um hvort þeir hygðust sækja um aftur.