Embætti ríkissaksóknara auglýst að nýju

Björn Bjarnason dómsmálaráðherra hefur frestað því að ráða nýjan ríkissaksóknara til næstu áramóta og mun Bogi Nilsson sinna starfinu þangað til. Fram kemur á vef dómsmálaráðuneytisins að samkomulag þessa efnis hafi orðið á milli Björns og Boga en til stóð að Bogi léti af embætti 1. júlí næstkomandi.

Í ljósi þessa samkomulags verður embætti ríkissaksóknara auglýst að nýju síðar á árinu.

Embættið var auglýst laust nú í vor og sóttu fimm manns um það, hæstaréttarlögmennirnir Brynjar Níelsson og Jóhannes Rúnar Jóhannsson, saksóknararnir Egill Stephensen og Sigríður Friðjónsdóttir og Jón H. B. Snorrason, varalögreglustjóri á höfuðborgarsvæðinu og fyrrverandi yfirmaður efnahagsbrotadeildar Ríkislögreglustjóra.

Jóhannes Rúnar dró hins vegar umsókn sína til baka og gaf meðal annars þá ástæðu að hann teldi að þegar væri búið að ráðstafa embættinu.

Upphaflega stóð til að ráða í starfið öðrum hvorum megin við helgina fyrir kosningahelgi en ráðherra frestaði því og gaf þær skýringar að fara þyrfti betur yfir umsóknirnar til þess til þess að fullnægja vel góðum stjórnsýsluháttum.

Brynjar Níelsson, einn umsækjenda, sagði í samtali við fréttastofu að hann væri ekki sáttur við þessa málsmeðferð ráðherra. Hann hefði engar skýringar fengið á henni og að hann biði eftir þeim.