Á allt eins von á sömu ríkisstjórn áfram

Steingrímur J. Sigfússon, formaður Vinstrihreyfingarinnar - græns framboðs, á allt eins von á því að Framsóknarflokkurinn og Sjálfstæðisflokkurinn endurnýi samstarf sitt í ríkissttjórn.

„Mér sýnist vötnin vera farin að hníga í þessa átt sem er talsvert undurarefni að mínu mati og mjög mikil umhugsunarefni út frá úrslitunum og skilaðboðunum frá þjóðinni. Það virðist vera að menn ætli bara að velja átakminnsta, þægilegasta en um leið metnaðarlausasta kostinn, að láta þetta lafa áfram á annarri hjörinni eins og ég hef orðað það," sagði Steingrímur í hádegisviðtalinu á Stöð 2 í dag.

Steingrímur segir aðspurður að það hljóti að vera miklar efasemdir innan Framsóknarflokksins um áframhaldandi samstarf í ljósi skrifa í blöð og blogg. Almennir flokksmenn hljóti að spyrja sig hvort forystan ætli að velja ráðherrastólana fram yfir hagsmuni flokksins. Flokkurinn þurfi að koma sér í skjól og endurnýja sig. „Það gera menn ekki með því að halda áfram helför af því tagi sem þessi ríkistjórnarþátttaka er að verða Framsóknarflokknum," segir Steingrímur.

Steingrímur segir ekkert til í þeim sögusögnum að viðræður séu milli vinstri grænna og sjálfstæðismanna um myndun ríkisstjórnar. Hann hafi einungis hitt Geir H. Haarde í sjónvarpsumræðum. Fólk sé þó eitthvað að tala saman en hann hafi lagt á það áherslu að þingmenn séu ekki að hringja út og suður.

Það séu þó alltaf einhverjir kanalar og fulltrúar í sveitarstjórnum hittist og spjalli saman. „Við höfum fyrst og fremst gengið úr skugga um það að skilaboðin séu skýr og að þau hafi komist til skila. Ég get alveg upplýst það að við höfum tryggt að Sjálfstæðisflokkurinn veit að við höfnum ekki viðræðum við þá," segir Steingrímur.

Steingrímur viðurkennir að mörg mál í slíkum viðræðum yrðu erfið. Stóriðjumálin og velferðarmálin væru líklega þau tvö stærstu mál sem ræða þyrfti um til að byrja með enda vildu Vinstri græn stóriðjustopp. Sagði hann aðspurður að ekki væri hægt að fara inn í viðræður með úrslitakosti og því yrðu viðræðurnar snúnar.

Þá segir hann flokkinn ólíkt ýmsum öðrum flokkum horfa til langs tíma en ekki samms og því geti vel komið til greina að sitja áfram í stjórnarandstöðu og byggja flokkinn enn frekar upp.