Björn fellur niður um eitt sæti vegna útstrikana

2514 manns, sem kusu Sjálfstæðisflokkinn í Reykjavíkurkjördæmi suður, strikuðu yfir nafn Björns Bjarnasonar dómsmálaráðherra og eru það 18,16 prósent kjósenda flokksins í kjördæminu.

Þetta þýðir að Björn færist niður eitt sæti á listanum og verður þriðji þingmaður flokksins í kjördæminu í stað þess að vera annar. Illugi Gunnarsson, sem er nýr á þingi, fer upp fyrir Björn í annað sætið. 20 prósent kjósenda þurftu að strika nafn Björns út til þess að hann félli niður um tvö sæti á listanum.

Áður hafði legið fyrir að Árni Johnsen, flokksbróðir Björns, færðist niður um eitt sæti í Suðurkjördæmi vegna útstrikana en þar strikuðu rúmlega 20 prósent kjósenda Sjálfstæðisflokksins nafnið hans út í kosningunum á laugardag. Hins vegar þurfti 25 prósent til þess að fella hann um tvö sæti.

Kjörstjórn í Reykjavíkurkjördæmi suður ákvað að birta nöfn þeirra sem fleiri en 50 strikuðu yfir í öllum flokkum. 182 strikuðu yfir nafn Kolbrúnar Halldórsdóttur, Vinstri - grænum, 141 yfir nafn Ingibjargar Sólrúnar Gíslasdóttur, formanns Samfylkingarinnar, 119 yfir nafn Ástu Möller, Sjálfstæðisflokki, 97 yfir nafn Marðar Árnasonar, Samfylkingunni, og 50 yfir nafn Jónínu Bjartmarz, Framsóknarflokki.