Alger bylting í samgöngumálum

Alger bylting verður í samgöngumálum á höfuðborgarsvæðinu á næstu þremur til fimm árum með lagningu Sundabrautar, tvöföldun Hvalfjarðarganga og hluta Vesturlandsvegar. Heildarkostnaður við þetta er um þrjátíu milljarðar króna. Forsætisráðherra telur jákvætt að hraða Sundabraut með þátttöku Faxaflóahafna.

Stjórnarformaður og forstjóri Faxaflóahafna gengu á fund forsætis, samgöngu, og viðskiptaráðherra í stjórnarráðinu í morgun, til að ræða hugmyndir sínar um aðkomu Faxaflóahafna að fjármögnun og lagningu Sundabrautar.

Geir H. Haarde forsætisráðherra sagði að loknum fundinum í morgun að ákveðið hafi verið að skipa starfshóp sem á að fara yfir alla þætti málsins. Geir sagði að honum litist vel á hugmyndir Faxaflóahafna og framlag þeirra til málanna væri jákvætt.

Það mun liggja fyrir í lok sumars hvaða leið verður valin og um leið hvað langan tíma mun taka að klára lagningu brautarinnar. Sturla Böðvarsson samgönguráðherra sagði enn ekki liggja fyrir hvort valin yrði svo kölluð innri eða ytri leið, en það ætti að liggja fyrir í lok sumars. Þá gætu menn betur gert sér grein fyrir umfangi verkefnisins og hversu langan tíma það muni taka.

Sundabraut mun kosta um 22 milljarða, þar af kosta göngin um 16 milljarða. Björn Ingi Hrafnsson stjórnarformaður Faxaflóahafna minnir á að þær séu stærsti einstaki eigandinn í Speli sem einnig reki Hvalfjarðargöngin. Þar sé nú verið að skoða að tvöfalda göngin og Vesturlandsveginn, sem gæti verið tilbúið til framkvæmda eftir tvö ár.

Stækkun Hvalfjarðarganga kostar á bilinu 5-8 milljarða að sögn Björns Inga og hægt væri að hefja framkvæmdir innan tveggja ára.