Law á leiðinni til Reykjavíkur aftur

Breski sjarmörinn Jude Law er fallinn fyrir landi og þjóð. Samkvæmt heimildum Fréttablaðsins er leikarinn væntanlegur aftur til landsins í lok þessa mánaðar og þá verða engin börn með í för heldur nánir vinir leikarans.

Eftir því sem Fréttablaðið kemst næst mun Jude ætla að sýna félögum sínum næturlífið í Reykjavík og hefur þegar pantað hinn sívinsæla Óliver fyrir sig og sína. Ekki er ólíklegt að stjarnan velji 101 hótel sem næturstað enda stutt þaðan í miðnæturbrölt miðborgarinnar. Arnar Þór Gíslason, framkvæmdarstjóri Óliver, vildi ekkert tjá sig um málið þegar Fréttablaðið innti hann eftir svörum en meðal helstu vina Law er skoski stórleikarinn Ewan McGregor og hinn enski Johnny Lee Miller.

Þetta verður í fjórða sinn sem Law kemur hingað til Íslands. Síðast var hann hér ásamt börnum sínum þremur og barnapíu og kíkti meðal annars á skauta, skellti sér í sund og fór í skoðunarferð um höfuðstöðvar Latabæjar í Garðabæ. Þá var Jude einnig tíður gestur hjá Íshestum og reið út með krökkunum sínum.

Mestu athyglina vakti hins vegar kvöldverður hans og íslensku leikkonunnar Höllu Vilhjálmsdóttur á Dómó en þau brugðu sér síðan á Sirkus. Fréttir af þessu rötuðu á síður breska slúðurblaðsins The Sun og ekki sér fyrir endann á því fári enda greindi Fréttablaðið frá því í gær að argentískt slúðurblað hefði haldið því fram að þau væru par.