Björk á Hróarskeldu

Eitt af stóru nöfnunum á Hróarskeldu næsta sumar verður íslenskt. Skipuleggjendur hátíðarinnar upplýstu í morgun að Björk verður ein af stjörnunum á næsta ári. Hún spilaði síðast á Hróarskeldu árið 2003 þegar hún var lokaatriðið á appelsínugula sviðinu. Þeir tónleikar lifa í minningunni sem einhverjir þeir flottustu í seinni tíma sögu hátíðarinnar, að því er kemur fram í frétt dönsku sjónvarpsstöðvarinnar TV2 í dag. Þetta verða einu tónleikarnir hennar á Norðurlöndum á árinu, að sögn Politiken.

Fyrsta stóra nafnið sem skipuleggjendur birtu fyrir þessa hátíð er kaliforníska sveitin Red Hot Chili Peppers, en jafnt fræg sem óþekkt hljómsveitarnöfn fara nú að mjatlast inn á lista hátíðarinnar.