Sienna Miller og P. Diddy að slá sér upp?

Talið er að leikkonan Sienna Miller og rapparinn P. Diddy, öðru nafni Sean Combs, séu að slá sér upp. Þessar sögusagnir fengu aukinn hljómgrunn eftir að til þeirra sást á hóteli í New York eftir að hafa skemmt sér saman um kvöldið. Áður hafði sést til þeirra í nánum samræðum á næturklúbbnum Harry O's í Park City í Utah á Sundance kvikmyndahátíðinni. Þegar P. Diddy kom auga á ljósmyndara við hótelið sendi hann öryggisverði sína til að óska eftir því að myndunum, sem af þeim náðust, yrði eytt. Hann neitaði því að nokkuð væri á milli þeirra og kvaðst aðeins vera að gefa Siennu far en þau væru bara góðir vinir. Rapparinn sást síðan fara inn á hótelið á eftir Siennu og var þar inni í rúmar 45 mínútur. Sienna, sem er fyrrum unnusta leikarans Jude Laws, hefur verið orðuð við leikarann Josh Hartnett undanfarið en hún hefur neitað því. P. Diddy er nýbúinn að eignast tvíbura með kærustu sinni til margra ára, Kim Porter.