Nágrannar leikarans Charltons Heston hafa höfðað mál á hendur honum vegna aurskriðu sem rann niður hæðina frá húsi hans í miklum rigningum fyrir tveim árum. Nágrannarnir segja að skriðan hafi skemmt eign þeirra og rýrt endursöluverð hennar. Þeir vilja fá áttatíu milljónir króna í bætur.
Lögfræðingur Hestons segir að hann eigi um það bil tíu prósent af hæðinni sem hús hans stendur á, nágrannarnir eigi restina. "Þetta er þeirra hæð," segir hann. Charlton Heston og kona hans hafa búið á Mulholland Drive síðan 1959. Hann byggði húsið fyrir tekjur sem hann fékk fyrir myndina Ben Hur.
Heston sem er 83 ára gamall hefur greinst með Alzheimer. Meðal annarra stórmynda sem hann lék í voru Boðorðin tíu, þar sem hann lék Móses, og Apaplánetan.
