Viðurkenni að aðstaðan var ekki nógu góð

KSÍ hefur svarað bréfi Samtaka íþróttafréttamanna frá því morgun þar sem farið var fram á tafarlausar úrbætur á aðstöðu þeirra á Laugardalsvelli. Útspil KSÍ er að boða forsvarsmenn samtakanna á fund um hádegisbilið á morgun. Þórir Hákonarson, framkvæmdastjóri KSÍ, viðurkennir í samtali við Vísi að aðstaðan hafi ekki verið góð. Þorsteinn Gunnarsson, formaður Samtaka íþróttafréttamanna er þó ekki sáttur og býst við mæta í kraftgalla á næsta landsleik.

"Ég skil gremju manna því aðstaðan á þessum leik var ekki nógu góð. Það verður bara að viðurkennast," segir Þórir Hákonarson, framkvæmdastjóri KSÍ, um gagnrýni íþróttafréttamanna á vinnuaðstöðu þeirra á leik Íslands og Spánar á Laugardalsvelli á laugardagskvöldið. Þórir hefur boðað forsvarsmenn samtakanna á sinn fund á morgun.

Þar sátu íþróttafréttamennirnir á opnu svæði, norpandi í norðanáttinni og gátu vart skrifað um leikinn vegna krókloppinna handa og drukkinna einstaklinga sem ráfuðu um á meðal íþróttafréttamannanna eins og aðstaða þeirra væri umferðarmiðstöð.

Þorsteinn Gunnarsson, formaður Samtaka íþróttafréttamanna, sem bað um skýr svör í bréfi sínu til KSÍ í morgun, gefur lítið fyrir þetta útspil Þóris og býst við að hann og kollegar hans þurfi að dusta rykið af kraftgöllunum fyrir leik Íslands og Norður Írlands á miðvikudaginn. "Þetta svar KSÍ veldur mér vonbrigðum og svarar á engan hátt okkar spurningum. En við mætum á fundinn og sjáum hvað setur," segir Þorsteinn.