Fasteignakaupendur vilja Íbúðalánasjóð í óbreyttri mynd

Mikill meirihluti fasteignakaupenda vill að Íbúðalánasjóður starfi áfram í óbreyttri mynd. Þetta kemur fram í nýrri könnun sem Capacent Gallup gerði fyrir Íbúðalánasjóð í júní og júlí. Tæplega 83% eru þessarar skoðunar samkvæmt könnuninni. Ámóta margir og í sambærilegri könnun í lok síðasta árs. Rúm 9% telja að sjóðurinn eigi að vera heildsala og einungis 8,4% vilja að Íbúðalánasjóður hætti starfsemi og viðskiptabankarnir sjái alveg um íbúðalán, að því er fram kemur í fréttatilkynningu frá Íbúðarlánasjóði.

Fleiri en 8 af hverjum 10 hafa talið að Íbúðalánasjóður ætti að starfa í óbreyttri mynd í sambærilegum könnunum sem Capacent Gallup hefur gert fyrir sjóðinn síðastliðið eitt og hálft ár.

Nærri þrír af hverjum fjórum fasteignakaupendum eru mjög eða frekar jákvæðir gagnvart Íbúðalánasjóði og aðeins 7% eru mjög eða frekar neikvæðir gagnvart sjóðnum. Fimmtungur er hvorki jákvæður né neikvæður.

Þegar spurt var hver ætti að sjá um veðtryggð húsnæðislán svöruðu tæplega 40% Íbúðalánasjóður og rúmlega 40% bæði Íbúðalánasjóður og bankarnir. Tæplega 20% vildu fela viðskiptabönkunum einum að sjá um slík lán.

Hringt var í 1600 einstaklinga sem keyptu fasteign í febrúar til júní. Endanlegt úrtak var 1.469. Svarhlutfall var 56,4%.