Hirsi Ali með fyrirlestur í hádeginu

Sómalski rithöfundurinn Ayaan Hirsi Ali, sem fyrir tveimur árum var valin ein af 100 áhrifamestu mönnum heims af tímaritinu Time, verður með fyrirlestur á Bókmenntahátíð Reykjavíkur nú klukkan hálfeitt.

Hátíðin hófst í gær en í dag byrjaði dagskráin á fyrirlestri kanadíska rithöfundarins Kim Echlin. Þá tekur Hirsi Ali við en hún hefur vakið mikla athygli fyrir mannréttindabaráttu sína og harða gagnrýni á viðhorfi til kvenna í íslömskum ríkjum.

Klukkan tvö verða svo pallborðsumræður í Norræna húsinu um sögulegar skáldsögur og í kvöld klukkan átta verður upplestur fimm rithöfunda í Iðnó.